Amharic Tube - All Amharic TV Channels and Shows
Welcome
Login

Amharic


  • The weekend has arrived. Watch the best Ethiopian movies.

    Ethiopian Movie Ayrak full Ethiopian Movie Hamaresha Ethiopian Movie Rebuni Wech Guday Movie

    Speaker-of-the-House-John-Boehner-speaks-at-the-US-Capitol-AFP

    John Boehner, House Speaker, Will Resign From Congress

    US House Speaker John Boehner will resign from his leadership position and give up his seat at the end of...
    hamarsha5
    public tr
    balehabtu3
    Read more »
  • በዓይነቱ ልዩ የሆነው ዋሽንግተን ሜዲካል ሴንተር ተመርቆ አገልግሎት መስጠት ጀመረ Washington Medical Center built by Ethiopian diaspora returnees and local doctors inaugurated in Addis Abeba

    [ሰንደቅ ጋዜጣ]

    በአሜሪካ ከ25 ዓመታት በላይ በህክምና ሙያ ሲያገለግሉ በቆዩ የውስጥ ደዌ ስፔሻሊስት ሀኪሞች እና በሀገር ውስጥ ባሉ ሌሎች ኢትዮጵያዊያን ሀኪሞች ጥምረት የተቋቋመው ዋሽንግተን ሜዲካል ሴንተር ዘመናዊ በሚባሉ የህክምና መስጫ መሳሪያዎችና ባለሙያዎች ተደራጅቶ ባለፈው ቅዳሜ ተመርቆ ዕለት አገልግሎት መስጠት ጀመረ።

    ቦሌ ሩዋንዳ ኤምባሲ ፊት ለፊት የሚገኘው ዋሽንግተን ሜዲካል ሴንተርን መርቀው የከፈቱት የኢፌዲሪ ንግድ ሚኒስትር ዴኤታ አቶ አሊ ሲራጅ ናቸው። አቶ አሊ በወቅቱ እንደተናገሩት ባለፉት አስር ዓመታት ፈጣን የኢኮኖሚ ዕድገት በማስመዝገብ ላይ ባለችው ኢትዮጵያ ከኢኮኖሚው ጋር የሚጓዙና ደረጃቸውን የጠበቁ የህክምና ተቋማትን ማዘጋጀት አስፈላጊ እንደሆነ ጠቅሰው፤ በዚህ ረገድ ሀገራቸውን ለማገልገል ወደ ሀገር በቤት በተመለሱ ኢትዮጵያውያንና ትውልደ ኢትዮጵያውያን የተከፈተው ዋሽንግተን ሜዲካል ሴንተር ከፍተኛ ጠቀሜታ ይኖረዋል ብለዋል። የዚህ አይነት ተቋማትንም መንግስት ከጎናቸው ሆኖ እንደሚያግዝም ተናግረዋል።

    የዋሽንግተን ሜዲካል ሴንተር ዋና ስራ አስፈፃሚ ዶ/ር ማርቆስ ፈለቀ በበኩላቸው ባደረጉት ንግግር የረጅም ዓመታት ሙያዊ እውቀታቸውና ልምዳቸውን ይዘው ወደ ሀገር ቤት በተመለሱ ኢትዮ-አሜሪካውያንና በሀገር ውስጥ በሚሰሩ ባለሙያዎች በ60 ሚሊዮን ብር ካፒታል የተቋቋመው ዋሽንግተን ሜዲካል ሴንተር ካርድ ከማውጣት ጀምሮ በዘመናዊ ኤሌክትሮኒክስ መሳሪያዎች የሚከናወን እንደሆነ ጠቅሰው የታካሚዎች የህክምና ሪከርድም ከወረቀት ነፃ ሆኖ በኮምፒውተር የሚገናኝ እንደሆነና ማዕከሉን የራሱ መድኃኒት ቤት ዘመናዊ አምቡላንስ፤ ዲጂታል የኤክስ ሬይ ማሽን፤ አልትራ ሳውንድ፣ ኢ ኬ ጂ ምርመራ እና ዘመናዊ ላቦራቶሪ የተደራጀ መሆኑን አስረድተዋል። ማዕከሉ በቀጣይነትም ሙሉ በሙሉ ወደ ስፔሻላይዝድ ሆስፒታል በማሳደግ ተደራሽነቱን እና አገልግሎቱን እንደሚያሰፋ ዶ/ር ማርቆስ ጨምረው አስታውቀዋል።

    ሀገርንና ወገንን የማገልገል ሀላፊነታቸውን ለመወጣት ወደ ሀገር ቤት በተመለሱ ስፔሻሊስት ሀኪሞች የተቋቋመው ዋሽንግተን ሜዲካል ሴንተር አገልግሎቱን ለሁሉም ታካሚ ተደራሽ ሊባል በሚችል ተመጣጣኝ ዋጋ ለሀገር ውስጥና ተቀማጭነታቸው በአዲስ አበባ ለሆኑ ዲፕሎማቶችና የውጭ ሀገር ሰዎች በአካል፤ በስልክ፤ በኢንተርኔት በሚያዝ ቀጠሮ የማዕከሉን ስፔሻሊስት ዶክተሮች ማግኘት እንደሚቻል የማዕከሉ ሜዲካል ዳይሬክተር ዶ/ር ፋሲል ተፈራ ገልፀዋል።

    ‘ለሁሉም የውስጥ ደዌ ህመሞች በሙያው የካበተ ልምድ ያላቸውን ሀኪሞች ለ24 ሰዓታት የህክምና አገልግሎት ይሰጣል። አስፈላጊ ሲሆንም የተለየ ህክምና ለሚያስፈልጋቸው ታማሚዎች ሌሎች ስፔሻላይዝድ የሆኑ ሀኪሞችን በሀገር ውስጥ ባሉና ከውጪ ሀገር በማስመጣት ተጨማሪ የሙያና የልምድ ልውውጥ የሚደረግበት ሥርዓትም ተዘርግቷል’ ብለዋል ዶ/ር ፋሲል።

    ዋሽንግተን ሜዲካል ሴንተር ተመርቆ ስራውን ሲጀምር ከፍተኛ የመንግስት ባለስልጣናት፤ የህክምና ባለሙያዎች፤ ዲፕሎማቶች አምባሳደሮችና ጥሪ የተደረገላቸው እንግዶች ተገኝተዋል። በአሜሪካ የተማሩና ያገለገሉ ሀኪሞች ይህንን ሜዲካል ሴንተር ወደ ሀገራቸው ተመልሰው ለመክፈት የአንድ ዓመት ጊዜ የወሰደባቸው ሲሆን ለማዕከሉ እውን መሆን መንግስት አስፈላጊ የሆኑ ዘመናዊ የህክምና መሳሪያዎችን ወደ ሀገር ቤት ለማስገባት የኢንቨስትመንት ማበረታቻ ከማድረግ ጀምሮ የሚመለከታቸው መስሪያ ቤቶች ሙሉ ድጋፍ ማድረጋቸው ተዘግቧል።

    Receive Ethiopian News and Videos by email. Sign up for Email alerts ትኩስ እና ሰበር ዜና፣ በብዛት የታዩ ቪድዮዎችን፣ ድራማዎችን፣ሙዚቃዎችን፣ ጠቃሚ ምክሮችን እና አስገራሚ ታሪኮችን በኢሜል አድራሻዎ እንልካለን። ኢሜሎን ያስመዘግቡ።

     

    Read more »
  • Fire damages Gerji electric distribution center የገርጂ ኤሌክትሪክ ማሰራጫ ጣቢያ ቃጠሎ ደረሰበት

    ተጻፈ በ   (Reporter)

    የገርጂ ኤሌክትሪክ ማሰራጫ ጣቢያ ቃጠሎ ደረሰበት

    በኢትዮጵያ ኤሌክትሪክ አገልግሎት የገርጂ ማሰራጫ ጣቢያ ትናንትና ከሰዓት በኋላ 10፡30 ላይ የእሳት ቃጠሎ ደረሰበት፡፡ ለሁለተኛ ጊዜ የተቃጠለው የገርጂ ማሰራጫ ጣቢያ፣ ከመገናኛ በኡራኤል እስከ ቦሌ ዓለም አቀፍ አውሮፕላን ማረፊያ ድረስ ያለውን አካባቢ የሚሸፍን መሆኑም ታወቋል፡፡

    ምክንያቱ ምን እንደሆነ ባለመታወቁ፣ የዕለቱ ተረኛ ሠራተኞችን ፖሊስ በቁጥጥር ሥር አውሎ በምርመራ ላይ መሆኑንም ለማወቅ ተችሏል፡፡ በሁሉም የአገሪቱ አካባቢዎች በተለይ በጥቅምት ወር መጨረሻ አካባቢ በተደጋጋሚ የኃይል ማቋረጥ ማጋጠሙም ይታወቃል፡፡ ሰሞኑን የኢትዮጵያ ኤሌክትሪክ ኃይልና አገልግሎት ኃላፊዎች ጊዜያዊ ችግር ተፈጥሮበታል ወደተባለው የጣና በለስ የኃይል ማመንጫ መጓዛቸው ተነግሯል፡፡ የጣና ብልሽትም ሆነ በገርጂ ማሰራጫ ጣቢያ የደረሰውን አደጋ እንዲያብራሩ የመሥሪያ ቤቱን ኃላፊዎች ለማግኘት ቢሞከርም፣ ምላሽ ለመስጠት ፈቃደኛ ሳይሆኑ ቀርተዋል፡፡

    (በታምራት ጌታቸው)

    ትኩስ እና ሰበር ዜና፣ በብዛት የታዩ ቪድዮዎችን፣ ድራማዎችን፣ሙዚቃዎችን፣ ጠቃሚ ምክሮችን እና አስገራሚ ታሪኮችን በኢሜል አድራሻዎ እንልካለን። ኢሜላችሁን አስመዘግቡ።

    Read more »
  • ራሱን ዶክተር ኢንጂነር እያለ የሚጠራው ሳሙኤል ዘ ሚካኤል ክስ ተመሰረተበት Samuel ZeMichael charged

    አዲስ አበባ፣ መስከረም 12፣ 2007(ኤፍ.ቢ.ሲ.) ራሱን ዶክተር ኢንጂነር እያለ የሚጠራው ሳሙኤል ዘ ሚካኤል ክስ ተመሰረተበት

    አቃቤ ህግ ማታለልና በሀሰት ሰነድ መገልገል የሚሉ ሶስት ክሶች ናቸው የመሰረተበት።

    በፌዴራሉ ከፍተኛ ፍርድ ቤት አራዳ ምድብ ችሎት ከቀረቡት ክሶች መካከል በ12/04/06 ቦሌ ክፍለ ከተማ ልዩ ቦታው ገርጂ አምባሳደር ልብስ ስፌት ውስጥ ተጠርጣሪው ወንጀል መፈፀሙን ይጠቅሳል።

    ዶክተር ኢንጂነር ነኝ በማለት አሳሳች ቃል በመናገር የድርጅቱን ባለቤት አቶ ሰኢድ መሀመድን አጭበርብሯል የሚለው በክሱ ተመልክቷል።

    ድርጅትዎን በተለያዩ መድረኮች አስተዋውቃለው ስኬታማ የሆኑ ሰዎችንና ጠቅላይ ሚኒስትሩን ጨምሮ 20 ታዋቂ ሰዎች የሚካተቱበትን መፅሀፍ እያዘጋጀው በመሆኑ ድርጅትዎን በዚህ መፅሀፍ አስተዋውቃለሁ በማለት የተሳሳተ እምነታቸውን በመጠቀም ከ58 ሺህ ብር በላይ ወሰዶባቸዋል የሚልም በክሱ ተጠቅሷል።

    ከእኝህ ግለሰብ ተማሪዎችን አሰልጥኜ አስመርቃለሁ በሚል ሰበብ 4 ሙሉ ልብሶችን ቼክ ሰጥቶ መውሰዱም በክሱ ተጠቅሷል።

    ከቦሌ ቅርንጫፍ ወጋገን ባንክ በተዘጋ የሂሳብ ቁጥሩ በሌለው ስንቅ የአልባሳቱን ዋጋ 6 ሺህ ብር ቼክ ፈርሞ በመስጠትም ተከሷል።

    በ11/07/06 በግምት ከጠዋቱ 3 ሰዓት ቦሌ ወረዳ 3 ልዩ ቦታው ፒኬ ህንፃ የኢትዮጵያ ንግድ ባንክ ቻይና አፍሪካ ቅርንጫፍ ተፈፀመ የተባለውን ወንጀል አቃቤ ህግ 3ኛ ክስ አድርጎታል።

    ግለሰቡ የካ ክፍለ ከተማ ቤቴል ሜዲካል ኮሙኒኬሽን ኤንድ ኮንሰልቲንግ ሀላፊነቱ የተወሰነ የግል ማህበር የሚል ስም የተሰጠውን የንግድ ፍቃድ አሳይቶ ብር ለመበደር ይሄዳል።

    ይህ ንግድ ፍቃድ ከ2004 እና 2005 አ.ም ምንም እድሳት አልተደረገለትም የሚለው በክሱ ተጠቅሷል።

    ተከሳሹ ግን የ2 ቱንም አመታት የንግድ ፍቃድ እንደታደሰ በማድረግ በራሱ እጅ ፅሁፍ በመፃፍና በመፈረም እንዲሁም ሀሰተኛ ማህተም በመምታት ለባንኩ አቅርቧል።

    በመሆኑም አቃቤ ህግ በሀሰተኛ ሰነድ በመገልገል ወንጀል ክስ መስርቶበታል።

    ተከሳሹ ሶስቱንም ክሶች ጠበቃ አቁሜ እከራከራለሁ በማለቱ የአራዳ ምድብ ችሎት ጠበቃ አቁሞ እንዲከራከር ለ15/01/07 ተለዋጭ ቀጠሮ ይዟል።

    ትኩስ እና ሰበር ዜና፣ በብዛት የታዩ ቪድዮዎችን፣ ድራማዎችን፣ሙዚቃዎችን፣ ጠቃሚ ምክሮችን እና አስገራሚ ታሪኮችን በኢሜል አድራሻዎ እንልካለን። ኢሜላችሁን አስመዘግቡ።

    Read more »
  • Residents received eviction notice for Kebele homes before their condos are ready

    ነዋሪዎች የኮንዶሚኒየም ቤታቸው ሳይጠናቀቅ ከቀበሌ ቤት እንድንወጣ የሰባት ቀን ማስጠንቀቂያ ተሰጠን አሉ 

    በ ፀጋው መላኩ (ሰንደቅ ጋዜጣ)

    የአፍሪካ ህብረት ቁጥር ሁለት የመልሶ ማልማት ተነሺዎች በምትክነት የተሰጣቸው የኮንዶሚኒየም ቤት ሳይጠናቀቅ ይኖሩበት ከነበረው የቀበሌ ቤት በሰባት ቀናት ለቀው እንዲወጡ ማስጠንቀቂያ የተሰጣቸው መሆኑን ገለፁ። ነዋሪዎቹ የአፍሪካ ህብረት አካባቢን መልሶ ለማልማት በተነሺነት 126 አባወራዎች በልዩ ሁኔታ ባለፈው ሰኔ 27 ቀን 2006 ዓ.ም የኮንዶሚኒየም ቤት እጣ የወጣላቸው መሆኑን ገልፀው፤ እጣው በደረሳቸው ሳይት ሄደው ሲመለከቱ ግን ቤቶቹ ውሃና መብራት ያልገባላቸው እንዲሁም የውስጥ ለውስጥ መንገድ ያልተሰራላቸው መሆኑን አመልክተዋል።
    የቤቶች ኤጀንሲ የቤቶችን ግንባታ በተገቢው ሁኔታ ባላጠናቀቀበት ሁኔታ ቤቱን በሰባት ቀናት ለቀው እንዲወጡ በወረዳቸው አማካኝነት ደብዳቤ የደረሳቸው መሆኑን ነዋሪዎቹ ገልፀውልናል። ደብዳቤው “በዚህ ፕሮጀክት ተነሺ ከሆኑት የቀበሌ ቤቶች መካል የኮንዶሚኒም መቀበያ ሰርተፍኬት የወሰዱ በመሆኑ በእጅዎ የሚገኘውን የመንግስት ቤት ይህ ማስጠንቀቂያ ከተሰጠዎ ጊዜ ጀምሮ በሰባት ቀናት ውስጥ ለወረዳው ኮንዶሚኒየም ቤቶች ልማት ጽህፈት ቤት የመንግስትን ቤት እንዲያስረክቡ እናሳስባለን” ይላል።
    በአካባቢው 380 አባወራዎች በመልሶ ማልማት የሚነሱ ሲሆን እስከ አሁን የኮንዶሚኒየም እጣ እንዲወጣላቸው የተደረገው 126 አባወራዎች መሆኑን ነዋሪዎቹ ገልጸውልናል። በዚህ ዙሪያ ማብራሪያ እንዲሰጡን በቂርቆስ ክፍለከተማ የወረዳ ስድስት ዋና ስራ አስፈፃሚን እና ምክትል ስራ አስፈፃሚን እንዲሁም የኮሙኒኬሽን ቢሮ ኃላፊዎችን አግኝተን ለማነጋገር ጥረት ብናደርግም ሁሉም ለስልጠና ከቢሮ ውጪ ናቸው ስለተባልን ማግኘት አልቻልንም። የአዲስ አበባ ቤቶች ልማትና አስተዳደር ኤጀንሲ ዋና ስራ አስኪያጅ አቶ መስፍን መንግስቱን በስልክ ለማግኘት ያደረግነው ሙከራም አልተሳካም።

    ትኩስ እና ሰበር ዜና፣ በብዛት የታዩ ቪድዮዎችን፣ ድራማዎችን፣ሙዚቃዎችን፣ ጠቃሚ ምክሮችን እና አስገራሚ ታሪኮችን በኢሜል አድራሻዎ እንልካለን። ኢሜላችሁን አስመዘግቡ።

     

    Read more »
  • Russia foreign minister to visit Ethiopia የሩሲያ የውጭ ጉዳይ ሚኒስትር ኢትዮጵያን ሊጎበኙ ነው

    የሩሲያ የውጭ ጉዳይ ሚኒስትር ሰርጌይ ላቭሮቭ በመጪው መስከረም ወር ኢትዮጵያን ይጎበኛሉ፡፡ 

    ታማኝ የዜና ምንጮች ለሪፖርተር እንደገለጹት፣ ሚስተር ላቭሮቭ ለሁለት ቀናት ይፋ ጉብኝት በመስከረም ወር አጋማሽ ወደ አዲስ አበባ ይመጣሉ፡፡ የጉብኝቱ ዓላማ በኢትዮጵያና በሩሲያ መካከል ያለውን የኢኮኖሚና የፖለቲካ ግንኙነት ለማጠናከር እንደሆነ የገለጹት ምንጮች፣ ከፍተኛ የሩሲያ የንግድ ልዑክ ከሚስተር ላብሮቭ ጋር እንደሚመጣ አስረድተዋል፡፡ 

    ሚስተር ላቭሮቭ ከጠቅላይ ሚኒስትር ኃይለ ማርያም ደሳለኝ፣ ከፕሬዚዳንት ሙላቱ ተሾመ (ዶ/ር)፣ ከውጭ ጉዳይ ሚኒስትር ዶ/ር ቴድሮስ አድሃኖምና ከሌሎች ከፍተኛ የመንግሥት ባለሥልጣናት ጋር ተገናኝተው በሁለትዮሽ ግንኙነቶች የሚመክሩ ሲሆን፣  የትብብር ስምምነት ይፈርማሉ ተብሎ ይጠበቃል፡፡ 

    ሚስተር ላቭሮቭ ከዚህ ቀደም ኢትዮጵያን በ1998 ዓ.ም. ጎብኝተው እንደነበረ  ሲታወስ፣ ይህ ሁለተኛ ይፋ ጉብኝታቸው ይሆናል፡፡ ምንጮች ለሪፖርተር እንደገለጹት የሩሲያ አምራች ኩባንያዎች፣ የኢነርጂና የነዳጅ ኩባንያ ተወካዮች በንግድ ልዑኩ ውስጥ ይገኛሉ፡፡ የሩሲያ ኩባንያዎች በማኑፋክቸሪንግ፣ በኢነርጂና በነዳጅ ፍለጋ ሥራዎች ለመሳተፍ ፍላጎት አሳይተዋል ተብሏል፡፡ 

    በቅርቡ ‹‹ጂቢፒ›› ግሎባል ሪሶርስ የተሰኘ የሩሲያ የነዳጅ ኩባንያ በአፋር ክልል የነዳጅ ፍለጋ ሥራ ለማካሄድ ከማዕድን ሚኒስቴር ጋር ስምምነት ተፈራርሟል፡፡ ሶሻሊዝም በምሥራቅ አውሮፓና በአፍሪካ በነገሠበት ወቅት የቀድሞ ሶቭዬት ኅብረት ኩባንያዎች በኢትዮጵያ የነዳጅና የማዕድናት ፍለጋ ዘርፍ በርካታ ሥራዎች ሠርተዋል፡፡ 

    በ1970ዎቹ ሶቭዬት ፔትሮሊየም ኤክስፕሎሬሽን ኤክስፒዲሽን የተሰኘ ኩባንያ ከኢትዮጵያ የተፈጥሮ ዘይትና ጋዝ ፍለጋ ድርጅት ጋር በመተባበር ኦጋዴን ውስጥ ሰፊ የሆነ የነዳጅ ፍለጋ ሥራ ሠርቷል፡፡ 

    በተጨማሪም በማዕድን ዘርፍ ሩሲያውያን ውጤታማ ሥራ አከናውነዋል፡፡ በቦረና ዞን ቀንጢቻ አካባቢ የሚገኘውን የታንታለም ክምችት ያገኙት የሶቭዬት ጂኦሎጂካል ሰርቬይ የጂኦሎጂ ባለሙያዎች ነበሩ፡፡ ዛሬ ሚድሮክ ጐልድ ወርቅ የሚያመርትበት በለገደንቢ የሚኘውን የወርቅ ክምችት ያገኙት የሶቨዬት ኅብረት ባለሙያዎች ከኢትዮጵያውያን ጂኦሎጂስቶች ጋር በመተባበር ነበር፡፡ 

    በባሌ የሚገኘው የመልካ ዋከና የኃይል ማመንጫ ጣቢያና በጋምቤላ ክልል የሚገኘው የኤልዌሮ የመስኖ ግድብ የተገነቡት በሶቭዬት ኅብረት መሐንዲሶች ነበር፡፡ የናዝሬት ትራክተር መገጣጠሚያ ፋብሪካ የተገነባው እንዲሁ በሶቭዬት ኅብረት ባለሙያዎች ነበር፡፡ 

    ምንጮች ለሪፖርተር እንደገለጹት አሁን ሩሲያውያን ወደ ኢትዮጵያ ተመልሰው በማኑፋክቸሪንግ፣ በኃይል ማመንጨት፣ በማዕድን ፍለጋና ልማት እንዲሁም በነዳጅ ፍለጋ የመሰማራት ፍላጎት አሳይተዋል፡፡ በውጭ ጉዳይ ሚኒስትሩ ላቭሮቭ የሚመራው ልዑክ ዋና ዓላማም ለዚህ ዕቅድ መሠረት መጣል ነው፡፡ የሩሲያ ልዑካን ከውኃ፣ መስኖና ኢነርጂ ሚኒስትሩ አቶ ዓለማየሁ ተገኑ ጋር ተገናኝተው በኢነርጂ መስክ ስላለው የኢንቨስትመንት ዕድል እንደሚመክሩ ለማወቅ ተችሏል፡፡ 

    በአሁኑ ወቅት 30 የሚደርሱ የሩሲያ ኩባንያዎች በኢትዮጵያ በተለያዩ የኢንቨስትመንት ፕሮጀክቶች ተሳታፊ ናቸው፡፡ የሩሲያ ኩባንያዎች በኢትዮጵያ የባቡር መስመር ዝርጋታ ሥራ ላይ ለመሳተፍ ፍላጎት አላቸው፡፡ የኢትዮጵያ መንግሥትም ከሩሲያ መንግሥት ለባቡር ፕሮጀክቶች የሚውል ብድር ለማግኘት በመንቀሳቀስ ላይ ይገኛል፡፡ 

    ኢትዮጵያ የተለያዩ የግብርና ውጤቶች ወደ ሩሲያ ትልካለች፡፡ የኢትዮጵያ አበባ አምራቾች ምርቶቻቸውን በቀጥታ ወደ ሩሲያ ለመላክ ጥረት በማድረግ ላይ ይገኛሉ፡፡ በሩሲያ ትልቅ የአበባ ገበያ ያለ ቢሆንም፣ ሩሲያውያን የኢትዮጵያን አበባዎች የሚገዙት በቀጥታ ከኢትዮጵያ ላኪዎች ሳይሆን ከሆላንድ የአበባ ገበያ ነው፡፡ 

    ይህን ጉዳይ ያጠናው የኢትዮጵያ አየር መንገድ ከአዲስ አበባ ሞስኮ የመንገደኞችና የካርጎ በረራ ለመጀመር ዝግጅት በማድረግ ላይ ነው፡፡ ኢትዮጵያና ሩሲያ ከንግድና ኢንቨስትመንት በተጨማሪ በውትድርና መስክ ጠንካራ ግንኙነት አላቸው፡፡ የኢትዮጵያ መከላከያ ሠራዊት በአብዛኛው የታጠቀው ሩሲያ ሠራሽ መሣሪያዎችን ነው፡፡ የኢትዮጵያ አየር ኃይል የሚጠቀምባቸው ተዋጊ ጄቶች፣ ሔሊኮፕተሮችና የጭነት አውሮፕላኖች በሙሉ በሩሲያ የተፈበረኩ ናቸው፡፡ 

    የሚስተር ላቭሮቭ ጉብኝት አስመልክቶ አዲስ አበባ ከሚገኘው የሩሲያ ኤምባሲ መረጃ ለማግኘት የተደረገው ጥረት አልተሳካም፡፡ ይሁን እንጂ የኢትዮጵያ የውጭ ጉዳይ ሚኒስቴር ቃል አቀባይ አምባሳደር ዲና ሙፍቲ ሚስተር ላቭሮቭ በመስከረም ወር አዲስ አበባን እንደሚጎበኙ አረጋግጠዋል፡፡ 

    የኢትዮጵያና የሩሲያ ታሪካዊ ግንኙነት ከ17ኛው ክፍለ ዘመን ጀምሮ የዘለቀ ነው፡፡ ታዋቂው የሩሲያ ጸሐፊ አሌክሳንደር ፑሽኪን ወንድ አያቱ ኢትዮጵያዊ መሆን የሁለቱ አገሮች የቆየ ታሪካዊ ግንኙነት መገለጫ ተደርጎ ይወሰዳል፡፡ ኢትዮጵያ በውጭ ኃይሎች በተወረረች ቁጥር ሩሲያውያን ከኢትዮጵያ ጎን በመቆም ይታወቃሉ፡፡ ለዚህም በዓድዋ ጦርነት ወቅት የሩሲያ ቀይ መስቀል ለኢትዮጵያ አርበኞች ያደረገው የሕክምናና የመድኃኒት ዕርዳታ በዋነኝነት ይጠቀሳል፡፡ 

    ትኩስ እና ሰበር ዜና፣ በብዛት የታዩ ቪድዮዎችን፣ ድራማዎችን፣ሙዚቃዎችን፣ ጠቃሚ ምክሮችን እና አስገራሚ ታሪኮችን በኢሜል አድራሻዎ እንልካለን። ኢሜላችሁን አስመዘግቡ።

     
    Read more »
  • ‹‹ይድረስ ላንቺ›› ተፃፈ ከስድስተኛ ተከሳሽ - በዘላለም ክብረት Letter from prison from Zone 9 Blogger Zelalem Kibret

    ጦማሪና የህግ ባለሙያ ዘላለም ክብረት ከቂልንጦ ማረሚያ ቤት  የላከው አስገራሚ ደብዳቤ

    ‹‹ይድረስ ላንቺ››

    ተፃፈ ከስድስተኛ ተከሳሽ

    በዘላለም ክብረት 

     

    ወዳጄ ልቤ ከቶ እንደምንድን ነሽ? እውን እኔና አንቺ በአለም ስንኖር ሌላ የመገናኛ ዘዴ አጥተን ወደ snail mail እንመላለሳለን ብለሽ አስበሽ ታውቂያለሽ? ለማንኛውም እንዲህ ሆነ፡፡ ጥጋበኛ ሰው ያስቀናኝ ጀምሮልሻል፣ ጥጋበኛ እንዲህ የሚለው ትዝ አለኝ፡፡

     

    ‹‹ ….ደብዳቤ ቢጽፉት እንደ ቃል አይሆንም፣

    እንገናኝ እና ልንገርሽ ሁሉንም….››

     

    የደላው! ቢያሻው በደብዳቤ፣ ሲፈልግ በአካል እያማረጠ እኮ ነው፡፡ ለእኔ አሁን ባለሁበት ሁኔታ ሁለቱም ቅንጦት ነው (ወይ ደብዳቤው አይደርስሽም ወይም አንቺን ማየቴ ሊገደብ ይችላል)፡፡ ቆይ ትንሽ የጎን ወሬ ላዋራሽና ምክንያቱን እነግርሻለሁ፡፡ ‹‹አንቺ›› ተብለሽ በዚህ ደብዳቤ ስለተጠቀስሽው ‹‹አንቺ››ና ይሄን ደብዳቤ ለሚያነቡ ወዳጆች የዕምነት ክህደት ቃሌን በትንሹ ላስፍር፡፡

     

    እመቤት ሲልቪያ ፓንክረስት የኢትዮጵያ ፍቅረኛ (Ethiopian by choice) ዱቼ ሞሶሎኒ እትዮጵያን በወረረ ጊዜ፤ ወራሪው ሃይል በመላው ኢትዮጵያ ‹‹ የኢትዮጵያን ስም እያነሱ መፃፍ ክልክል ነው›› የሚል ያልተፃፈ አዋጅ አውጆ እንደነበር ይነግሩናል፡፡ በዚህም ምክንያት ፀሀፍቱና አዝማሪያኑ ስውር መጠሪያ መጠቀም ስላስፈለጋቸው እስከ ዛሬ ድረስ ተወዳጁ ሕዝባዊ ዘፈን አንቺ ልጅ አንቺ ልጅ እንደ ስውር የፍቅር ዘፈን ተበርክቷል፡፡ በዘፈኑ ‹‹አንቺ ልጅ ›› የተባለችውም ኢትዮጵያ ናት፡፡ እኔስ በዚህ ዘመን ‹ይድረስ ለባለ ታሪኩ›፣ ‹ይድረስ ለባለ ንብረቱ›… እንደሱ የሀዘን ደብዳቤ ርእስ ‹ይድረስ ለኢትዮጵያ › በማለት ፋንታ ‹ይድረስ ለአንቺ› ለማለት ስውር መጠሪያ ተጠቅሜያለሁ? ፤ በፍፁም! ጌቶች እንደሚሉት ሕገ መንግስቱ የመናገር ነፃነቴን ሙሉ ለሙሉ አስከብሮልኛልናi

    ቧልቱ ይቆየንና በዚህ ደብዳቤ ርዕስ ዙሪያ ያለማንም አስገዳጅነት የእምነት ክህደት ቃሌን ላስፍር አንቺ የተባለችው ኢትዮጵያ አይደለችም፡፡ ‹አንቺ› የኔዋ ሀቢቢ ግን ባለሽበት ይድረስሽ፡፡ ውዴ እንግዲህ በዚህ ደብዳቤ ያለፈውን እያነሳሁ እነግርሻለሁ፡፡ወይ ትስቂያለሽ (ሳቅሽ እንዴት ያምራል?) ወይ ደግሞ ታዝኛለሽ (እኔን!)

     

    ይህንን ደብዳቤ የመፃፍ መብት

    እነሆ ላንቺ ስለሆነው ሁሉ ላጫውትሽ ስጀምር፤ በመነሻው ያሰብኩት ነገር ይሄን ደብዳቤ የመፃፍ ሕጋዊ መብት አለኝን? የሚለውን ጥያቄ ነው፡፡ ለዚህም መነሻዬ አሁን ያለሁበት ሁኔታ ነው፡፡ በመጀመሪያ “ሕገ-መንግስታዊ ስርአቱንና ሕገ-መንግስቱን በሀይል ፣በዛቻና በአድማ ለመናድ በመምከር/ በመናድ” ወንጀል ተጠርጥሬ የታሰርኩ ቢሆንም፤ በታሰርኩ በ23ኛው ቀን ወንጀል ወንጀልን፤ ጥርጣሬ ሌላ ጥርጣሬን እየወለደ የተለያዩ የሽብር ተግባራትን ለመፈፀም ለማሴርና ለማነሳሳት ወንጀል ተጨማሪ ጥርጣሬ በፓሊስ ዘንድ በማሳደሬ የክፋት ልኬ ከፍ ያለ ሲሆን፤ በመጨረሻም ሕገ-መንግስቱን እንደ እያሪኮ ግንብ ለመናድ በመሞከር፤ ሕብረተሰቡን ደግሞ ከሚተነፍሱት የሰላም አየር ለማቆራረጥ ከማሰብ የተለያዩ የሽብር ተግባራትን ለመፈፀም ሲንቀሳቀስ ተይዟል በሚል ወንጀሎች ተከስሼ በማረፊያ ቤት እገኛለሁ፡፡ ይሄን ሁሉ የምነግርሽ ‹ለ አንቺ› አዲስ ነገር ነው በማለት አይደለም፡፡ ይልቁንስ ያለሁበት የእስር ሁኔታ ደብዳቤ ካንቺ ጋር እንዳልፃፃፍ ይከለክለኛልን?  የሚለውን ለማስረዳት በማሰብ ነው፡፡

     

    መቼም አሁን ያለሁበት ሁኔታ ተገቢ ነው ብዬ ባላምንም ‹ ዋስ ጠበቃዬ ነውና› ስለመብቴ ስናገር ያን የፈረደበት ህግ መጥቀሴ አልቀረም፡፡ ታዲያስ በእስር ላይ ያለ ሰው ከወዳጁና በሕይወቱ ጋር ደብዳቤ ሊፃፃፍ ምን ገደብ አለበት? ይላል ስል፤ ስለፌደራል ታራሚዎች አያያዝ የወጣ የሚኒስትሮች ምክር ቤት ደንብ ቁጥር 138/1999 በአንቀፅ 18 ላይ "ታራሚዎች (ተጠርጣሪዎች) ከማረሚያ ቤቱ (ከማረፊያ ቤቱ) ውጭ ካሉ ሰዎች ጋር መፃፃፍ ይፈቀድላቸዋል፡፡ ሆኖም ለጥበቃ ስራ ተቃራኒ የሆነ ተግባር እንዳይፈፀም በፅሁፎቹ ላይ ቁጥጥር ይደረጋል" በማለት የኔና አንቺ ደብዳቤ መፃፃፍ በሕግ የተፈቀደ ነገር እንደሆነ ደንግጎልናል፡፡ አሜን! (እንዲያው ይሄ ልጅ አሁንስ ተስፋዬ.. ማነው ? ሕጉ አይደለምን... የሚል የጅል ዘፈኑን አላቆምም እንዴ? ብለሽ እንደማታሾፊብኝ እምነቴ ነው)  ጓድ ሌኒን በዛች የፒተርስበርግ እስር ቤት ውስጥ ደብዳቤ መፃፃፍ አትችልም ተብሎ ተከለከለ እርሱ ግን የ Russia Social Democratic Party ን ፕሮግራም መፅሀፍ ውስጥ በየመስመሮቹ መሀል በ Invisible Ink በመፃፍ ታሪክ ስራ፡፡ እነሆ እኔ ግን በትናንት ሌኒኒስቶች (ፋና)፤ በዛሬ አሳሪዎቻችን መልካም ፈቃድ ደብዳቤ የመፃፃፍ ሕጋዊ መብቴ ተከብሮልኝ ይሔው በነጩ ወረቀት ላይ እንደ ሕዳሴው ባቡር እፈነጭበታለሁ፡፡

     

    እንዲህ ሆነልሽ

    አበባዬ- አፄ ሀይለስላሴ ከማንኛውም ባለስልጣን በሕይወት ዘመናቸው የበለጠ የቀረቧቸው የነበሩት ከ1934-1948 ድረስ ለ14 ዓመታት በፅህፈት ሚንስትርነት ያገለገሏቸውን ፀሀፊ ትዕዛዝ ወልደ ጊዎርጊስ ወልደ ዮሀንስን እንደ ነበር ነግሬሻለሁ? ወዳጅነትና ፍቅር ያልፋልና ሀይለስላሴና ወልደ ጊዎርጊስ ተጣሉ፡፡ የአፄ ሀይለስላሴ መንግስት መፅሀፍ ፀሀፊ አቶ ዘውዴ ረታ የወልደጊዎርጊስን መጨረሻ ሲተርኩ፡፡

     

    ‹‹ ፀሃያማው ሚያዚያ 17/1948 ቀን ለ ወልደ ጊዮርጊስ ወልደ ዮሀንስ እንደ ሌሎቹ ቀናት ብሩህ ሁና ነበር የነጋችው፡፡ ብሩህ ሁና እንደምታመሽም አልተጠራጠሩም ነበር፡፡ ምን ያደርጋል! ያች ክፉ ሰኞ የወልደጊዎርጊስ ከፍተኛ ስልጣን መጨረሻ ሆነች፡፡ በእኩለ ቀን ገደማ ቤተ መንግስት ተጠርተው ከፅህፈት ሚንስተርነታቸው ተነስተው የአሪሲ ጠቅላይግዛት ደረሳቸው››

    (መፅሀፉ አጠገቤ ስለሌለ ቃል በቃል አልጠቀስኩም)

     

    ወልደጊዮርጊስ ተሽረው ከቤተ-መንግስት እንዲርቁ የተደረገበት ምክንያት የሀይለስላሴን ወንበር በሰዒረ መንግስት ለመገልበጥ አስበዋል በሚል ምክንያት ነበር፡፡ወልደጊዎርጊስን እዚህ ጋር ማንሳቴ የሚያዚያ 17 ስለት እኔም ጋር በመድረሷ ነው፡፡ ውዴ! የእኔዋን ሚያዚያ 17/2006 ዓ.ም ውሎ እንደ ዘውዴ ረታ ስተርክልሽ ይሔን መሳይ ይሆናል፡፡

     

     ‹‹ ፀሃያማዋ ዓርብ ሜያዚያ 17/2006 ዓ.ም አጀማመር እንደ ወትሮው አልነበረም፡፡የጠዋት ትምህርት ክፍለ ጊዜ እንዳይረፍድብኝ እየተቻኮልኩ ወደማስተምርበት (የመጨረሻ ክላስ ነበር) አምቦ ዩንቨርሲቲ ስሄድ፤ ተማሪዎች አዲስ የተዘጋጀውን የአዲስ አበባ ከተማ መሪ እቅድ ‹ሕገ-መንግስታዊ አይደለም በሚል መነሻ የተለያዩ መፈክሮችን እያሰሙ ሰላማዊ ሰልፍ ወጥተው ነበር፡፡ ሰልፉ ሰላማዊ በሆነ መንገድ ተካሂዶ እንደተጠናቀቀ በሰልፍ ምክንያት የቀረውን የመጨረሻ ክላስ ሚያዚያ 18/2006 ዓ.ም ለማካሄድ ተማሪዎቼ ጋር ቀጠሮ ይዤ ብለይም ‹ሰው ያቅዳል ፣ እግዜር ይስቃል› እንደሚባለው ሆነና በዛች ሚያዚያ 17/2006 ዓ.ም ማምሻ ላይ እንደ ወልደጊዎርጊስ ወልደ ዮሃንስ ‹የመንግስትን ዙፋን በሕዝባዊ አመፅ ልትነጥቅ አሲረሀል› በሚል ክስ በቁጥጥር ስር እንደዋልኩ የደህንነት ግሪሳዎች (8 ወይም 9 የብሄራዊ መረጃና ደህንነት አባላት ) አበሰሩኝ፡፡

     

     ነገሩ ብዙም አልገረመኝም፡፡ ትንሽ ያበሳጨኝ አቶ ዘላለም ለጥያቄ ስለምንፈልጎት አዲስ አበባ የፌደራል ወንጀል ምርመራ ዘርፍ (ማእከላዊ) ነገ ጠዋት 3 ሰዓት እንዲገኙ ብለው በስልክ ቢጠሩኝ ‹እሺ ነገ ሶስት ሰአት ላይ ክላስ አለኝ ከክላስ ወደ 9 ሰዓት አካባቢ አመጣለሁ › ብዬ የምቀርበውን ሰው ይሔን ሁሉ ሀይል ከሁለት መኪና ጋር በመመደብ ላከበረኝ መንግስቴ ‹ጉዳት› ባሰብኩ ግዜ ነው፡፡ ላክባሪዬ ውለታ መላሽ ያርገኝ i

     

    ዓለሜ- ደብዳቤዬን እያነበብሽው እንደሆነ ተስፋ አለኝ፡፡ በቁጥጥር ስር ውሏል የምትለው ሀረግ ድሮም ትንሽ ፈገግ ታደርገኝ ነበር፤ አሁን ደሞ እኔን በቁጥጥር ስር ለማዋል ከአዲስ አበባ የመጣው የደህንነት ቡድን መሪ የመሰለኝ እድሜው ትንሽ ገፋ ያለ ሰው አንድ ሶስቴ ስልክ እየደወለ (ለማን ይሆን) ‹በቁጥጥር ስር አውለነዋል› እያለ መልክት ሲያስተላልፍ ስሰማ ፈገግ ማለቴ አልቀረም፡፡ ሀሳቤ ልቤ ፣ ይሄውልሽ ከስራ ቦታዬ  ‹ሀገር ሰላም› ሕዝባዊ አመፅ ለመቀስቀስ አስበሃል በሚል ጥርጣሬ በቁጥጥር ስር የዋልኩት እንዲህ እንደገለፅኩት ነበር፡፡ ከሚያዚያ 17/2006 -ሀምሌ 11/2006 ዓ.ም ያሉት 84 ቀናት የተደጋገሙና ሕይወት አልባ በመሆናቸው እንዲሁ ከማሰለችሽ 5 ሁነቶችን ልፃፍልሽና ዘና በይ፡፡ ከሁነቶቹ በፊት ግን ስለ 84 ቀናቱ አጭር መግለጫ ልስጥሽ፡፡

     

    የመጀመሪያዎቹን 75 ቀናት በፌደራል ወንጀል ምርመራ ዘርፍ (ማዕከላዊ) ጥብቅ ጥበቃ ክፍል (Siberia) ውስጥ 5 ቁጥር የተባለ 4 ሜትር በ5 ሜትር የሆነችና 5 ፍራሾችን በምትይዝ ክፍል ውስጥ ከረምኩ፡፡ ክፍሉ የተፈጥሮ ብርሀን በምንም አይነት መንገድ (ቀንን ጨምሮ) የማይገባበት ሲሆን፣ ለ24 ሰዓታት የመብራት ብርሀን ይበራበታል፣ መብራት ሲጠፋ በጄኔሬተር ሀይል ይተካል፡፡ ጄኔሬተሩ ነዳጅ ሲጨርስ ደግሞ ቀንም ሆነ ማታ ጨለማ ነው ባትሪ፣ ሻማ፣ ማንኛውንም አይነት ሰዓት መያዝ አይቻልም፡፡ ጠዋት 12 ላይ ለ10 ደቂቃ ፤ ማታ ከ10 ሰዓት አስከ 12 ሰዓት ለ 10 ደቂቃ ሽንት ቤት ለመጠቀም የክፍላችን በር የሚከፈት ሲሆን፤ በቀን ውስጥ ከ15 – 20 ደቂቃ ለሚሆን ጊዜ ደግሞ ከክፍላችን በየተራ ወጥተን ነፋስ/ፀሀይ እናየለን፡፡ ከዛ ውጭ በቀን ውስጥ ከ23 ለሚበልጠው ሰዓት የክፍሉ በር ዝግ ሲሆን ጮክ ብሎ ማውራትና መዝፈንም ቅጣት ያስከትላል፡፡ 

     

    ወዳጄ በነዚህ 75 ቀናት ስንት ‹አሸባሪ› ወዳጆችን አፈራሁ መሰለሽ፡፡ መንግስቴ የ 15 እና የ14 ዓመት ልጆችን በአሸባሪነት ጠርጥሮ እንደሚያስርም ለመረዳት ችያለሁ፡፡ አብረውኝ በእስር የነበሩት ወዳጆቼ ጥርጣሬ አጅግ የተለየ ነው፡፡ ከአል-ሸባብ አስከ ኦብነግ እስከ ኦነግ እስከ የቤኒሻንጉል ጉምዝ ሕዝቦች ነፃ እውጭ ግንባር እስከ አቂዳ(አዲስ የሽብር ቡድን)… ስቃይን መማር ጥሩ ነውና ሁለት ለሚሆኑ ቀናት ብቻዬን በመታሰሬም solitary confinement ን experience ለማድረግ ‹ታድያለሁ›፡፡ በርግጥ ብቻዬን ታስሬ ነበር ከምል ካንቺ ሀሳብ ጋር ታሰርኩ ብል ይቀለኛል፡፡

     

    አምስቱን ሁነቶች ዘንግቼ ስለ ስቃዬ ተንዛዛሁብሽ ይሆን? ለዚህ ተግባሬ በእስረኛ ቋንቋ ‹ተፀፅቻለሁ›፡፡ በቃ ወደ ጉዳዮቹ፡፡ ከዚህ በታች የምገልፃቸው ሁነቶች የ84 ቀናቱ የእስር ወቅት (የምርመራ) ጊዜ ምን እንደሚመስል እንደነበር ያስረዱሻል ብዬ አስባለሁ፡፡ (ሁሉም በእውነት እኔ ላይ የደረሱ ጉዳዮች ናቸው)፡

     

    1.    ተማሪዎቼን እንዳላበላሻቸው በማሰብ በቁጥጥር ስር ስላዋለኝ አመሰግናለሁ

    ሚያዝያ 17/2006 ከምሽቱ 2 ሰዓት ጀምሮ ከምኖርበት አምቦ ከተማ ወደ አዲስ አበባ ከደህንነቶች ጋር በቤት አውቶሞቢል እየተጓዝኩ ነው፡፡ አንድ ልጅ እግር ደህንነት ጠየቀኝ

    ‹‹ዘላለም የህግ መምሕር ነህ አይደል..››

                እኔ፡ አዎ

                ደህንነቱ  "ስንት ጠበቆች ዳኞች ማፍራት ሲጠበቅብህ አንተ ‹ልማቱን ካላደናቀፍኩ› ማለትህ እጅግ ያሳዝናል፡፡ ለማንኛውም እንኳን ተማሪዎቹን ሳታበላሻቸው በጊዜ በቁጥጥር ስር ዋልክ፡፡ ኧረ                  ለመሆኑ ከውጭ ስንት ሽህ ደላዮችን አግኝተሻል? Any way በልማታችን ቀልድ የለም" አለኝ፡፡ (እኔም ባስተማርኩባቸው 4 አመታት ስንት ተማሪዎችን ‹እንዳበላሸሁ › እያሰብኩና ልማታችን                  በወለደው የአስፋልት መንገድ ፏ ብዬ ከምሽቱ 3፡50 ላይ ማዕከላዊ ከቸች፡፡

     

    2.   አላማችሁ ምንድን ነው?

    እመቤቴ - መንግስት ሕዝባዊ አመፅ ለመቀስቀስ አሲራችኋል፤ ለዚህም በቂ ማስረጃ አለኝ በማለት ያሰረን ቢሆንም መንግስት ሀሳቡ እውነት ይሆንለት ዘንድ የእኛን ‹አዎ አሲረናል› የሚል መልስ በማባበልና በሀይል ለማግኘት ከመሞከር ውጭ ሌላ ያቀረበው አንዳችም ማስረጃም ሆነ መረጃ(በጠ/ሚንስትሮች ቋንቋ) አልነበረም/የለምም፡፡ ለዚህም ይመስላል በማእከላዊ የቆየሁባቸው ቀናት ምርመራው በሙሉ ‹አላማችሁ ምንድን ነው? በሚል ሕይወት አልባና አሰልቺ ጥያቄ የተሞላው፡፡ እኔም የዚህ ጥያቄ ሰለባ ሁኜ ከረምኩልሽ፡፡ እንዲህ ላጫውትሽ፣

               መርማሪ ፖሊስ (በተደጋጋሚ) - እንደ ዞን 9 አላማችሁ ምንድን ነው?

               እኔ፡ ዓላማችን ግልፅ ነው፡፡ ማንም ብሎጋችንን የተመለከተ ሰው በቀላሉ ሊረዳው ይችላል፡፡ባጭሩ የተለያዩ ተረኮችን የሚያስተናግድ እና ሕብረተሰባዊ ተዋጾን የሚያሳድግ ፕሮፋይል ነው፡፡

               መርማሪ ፖሊስ፡ እሱ ሽፋን ነው፤ እውነተኛ ዓላማችሁን ተናገር?

               እኔ፡ ከዚህ የተለየ አላማ የለንም!

     

    መርማሪ ፖሊሱ እንድንመልስለት የሚፈልገው ‹ከበላይ አካል› ይዞ እንዲመጣ የታዘዘውን መልስ፤ “አላማችን እንደ ጭቃ ተረግጦ፤ እንደ ገል ተቀጥቅጦ የሚገኘውን ጭቁን የኢትዮጵያ ሕዝብ ከተጫነበት ቀንበር ነፃ ማውጣት ነው፡፡ ለዚህም መሳካት ሕዝባዊ አመፅ ማደራጀትን እንደ ዋነኛ ዓላማ አድርገን ነው የተቋቋምነው፡፡”

    ሲሆን ይህ ደግሞ ከአላማችን ጋር የማይገናኝ መንግስታዊ ፍላጎት በመሆኑ እንዲህ አይነት መልስ ከእኔ ማግኘት እንደማይችል የተረዳው መርማሪ በተደጋጋሚ አስብበት በማለት ይሰናበተኝ ነበር፡

     

    3.   ከመርማሪዎች ጋር የነበረኝ ቆይታ

    የእኔ ፅጌሬዳ አላማችን እንደ ቡድን ባይጠይቁኝ ኑሮና የግል ዓላማዬን ቢጠይቁኝ አላማዬ ‹አንቺ› እንደሆንሽ ከመናገር ወደኋላ እንደማልል ታውቂያለሽ አይደል? የሆንሽ ‹አሸባሪ› ነገር፡፡ Any way ምርመራዬ ቀጥሎልኛል፡፡ ሁለት መርማሪዎች እየተፈራረቁ ገራሚ ገራሚ ጥያቄዎችን እየጠየቁኝ ነው፡፡ እነሆ ፡

             መርማሪ ፖሊስ፡ ከአለም መሪዎች ማን ማንን አግኝተህ ታውቃለህ?

             እኔ፡ ማንንም

             መርማሪ ፖሊስ፡ እኛ እኮ ያለመረጃ አይደለም እየጠየቅን ያለነው፡፡ ጉድ ሳይመጣብህ ብትናገር ይሻላል፡፡

             እኔ፡ እስኪ አስታውሱኝና ምን እንደተነጋገርን ልናገር፡፡ በርግጥ ባለፈው የኔልሰን ማንዴላ ማስታወሻ ፕሮግራም በ አፍሪካ ህብረት በተከበረበት ወቅት ጠ/ሚ ሀይለማርያም ደሳለኝ አግኝቻቸዋለሁ፡፡ ሌላ         የማስታውሰው የለም፡፡

            መርማሪ ፖሊስ፡ ህምእሺ ዘንድሮ ኦባማ ፊት ንግግር ለማድረግ ከተመረጡ 3 ኢትዮጵያውያን አንዱ አንተ አይደለህም?አሜሪካ በ አፍሪካ ጉዳይ ምን አግብቷት ነው፡፡ ወጣት አመራሮች ምናምን             እያለች የምታሰለጥነው?

            እኔ፡ ‹‹እንዴ ኦባማ ፊት ንግግር ነው ያልከኝ? ድንገት ከታሰርኩ በኋላ ተመርጬ (በማሾፍ ድምፀት) ከሆነ አላውቅም፡፡ወይ በስም መመሳሰል ሊሆን ይችላል፡፡ አሜሪካ በአፍሪካ ጉዳይ ምን አግብቷት           ነው? ላልከኝ ግን ወጣቶችን Empower ማድረግ ችግር ያለው አይመስለኝም ፤ ደግሞ በረሀቡም በድርቁም ጊዜ ርዳታ የምታደርገው እኮ አሜሪካ ነች፡፡ ምን አግብቷት ነው የምትረዳው አይባልም               መቼም?!››

            መርማሪ ፖሊስ፡ አሁን ዘመኑ የልማት ነው፤የምን ረሀብ ነው የምታወራው? በል ተወው፡፡

     

                (‹ፈሪ ውሃ ውስጥ ያልበዋል› ሰምተሻል ውቤ? መንግስቴ ብቻውን እየሮጠም ፍርሃቱና ስጋቱ ብዛቱ፡፡ የሚቆጨኝ ነገር ከዓለም መሪዎች ማን ማንን አግኝተሃል? ‹ስባል› ከሲሪላንካ ፕሬዜዳንት ጋር ተገናኝቼ ወደ ደቡብ አሜሪካ ፔሩ በመጓዝ ማቹፒቹን ጎብኝቻለሁ ብዬ ብናገር ኑሮ፤ ክሳችን ላይ ‹ከሲሪላንካ መንግስት ባገኘው የገንዘብና የመሳሪያ ድጋፍ ወደ ፔሩ በመጓዝ ሕገ-መንግስት እንዴት እንደሚናድ በማቹፒቹ ኮረብታ ስልጠና ወስዶ ተመልሷል፡፡ ለዚህ እንደ ማስረጃ ይሆን ዘንድ ላፕቶፔ ውስጥ የተገኙት ከ300 በላይ የቼጉቬራ ምስሎችና Machu Pichu: The Mecca of Hippies” የሚል ባለ 22 ገጽ ‹ሰነድ› አብሮ ይያዝልኝ ነበር፡፡ ሲያበሳጭ

     

    4.   ‹አሸባሪው› ገብረሕይወት ባይከዳኝና ሀገሪቱን በሀራጅ የመሸጥ ጉዳይ

    ፍቅር አደከምኩሽ አይደል?! ልጨርስ ስለሆነ ትንሽ ታገሺኝ፡ በዛውም ‹ፍቅር ታጋሽ ነው› የሚለውን Paulian ወንዴነት፤ ‹ፍቅር ታጋሽ ናት› በሚል ማስተካከያ እንድናርመው፡፡ የዚህ የምርመራ ነገር እኮ አላልቅልኝ አለ፡፡ በእስሬ ወቅት ሌላው በተደጋጋሚ እንዳስረዳ ስጨቀጨቅበት የነበረው ጉዳይ ‹ኒዮ-ሊብራልነቴና ልማትና ዲሞክራሲ ጎን ለጎን አብረው ይሄዳሉ ማለቴ ነበር፡፡

    መርማሪ ፖሊሶቹ እየተቀያየሩ ስለኢህአዴግ የፖሊሲ ትክክለኛነት ‹ያስረዱኝ› ነበር፡፡ “አንተ ምን ጎደለብኝ ብለህ ነው ነጭ አምላኪ የሆንከው ? ትንሽ የተስፋ ጭላንጭል ስናይ አንተና ጓደኞችህ አይናችሁ ለምን እንደሚቀላ እስኪ ንገረን ? ይህች አባቶቻችን ‹በደምና በጾም› ያቆዩልንን አገር አንተና ያንተ ትውልድ ግን ውበቷ እና ድንቅነቷ ላስጎመጃቸው ነጮች ለመሸጥ መደራደር ጀመራችሁ….” እያሉ ‹በባንዳነት› ሲከሱኝ ከረሙ፡፡ የሀገሪቱ ውበትና የነጮች በውበቷ መጎምጀት ነገር ሲነሳ ጊዜ ‹አንቺ› ትስቂ ዘንድ የሚከተለውን አንቀፅ አሻግሬ ታደሰ የተባሉ ፀሐፊ ከ 50 ዓመት በፊት ‹እኔና አንተ› ካሉት ጽሁፋቸው ላይ እጠቅስልሻለሁ

     

    "ኢትዮጵያ እጅግ ያማረች፤ የተዋበች ፤የተደነቀች፤ላያት ሁሉ የምታማልል፤የምታዘናጋ…….ናት፡፡ ዓይኗ የብር አሎሎ መለሎ ከአጥቢያ ኮከብ የተፎካከረ….. ነው፤ አገራችን ኢትዮጵያ ፅጌረዳ መስላ የሰኔን ቡቃያ ትመስላለች፡፡ የመስከረም አበባ ሆና በሩቅ ትስባለች፤የመስህቧ ኃይል ማግኔት ምስጋን ይንሳው፡፡ አገራችን ኢትዮጵያ ጥርሷ እንደ በረዶ ሆና ለፈገግታ ያህል ትንሽ ከንፈሯን ስትገልፀው እንኳንስ ለሰው ግብዙ መልዓክ ያብዳል፡፡ ኢትዮጵያ ፀጉሯ የሀር ነዶ ነው፤ኢትዮጵያ አጠረች ፤ረዘመች፤ወፈረች፤ብሎ ስለአካሏ መናገር አይቻልም፡፡ እንዲያው ዝም ይሻላል፡፡ በጠቅላላው ኢትዮጵያ ውበቷ ሰነፉን ይገድላል፡፡ ብርቱውን አነሁልሎ ያሳብዳል፡፡ እግዚአብሔር፤ኢትዮጵያን ሲፈጥር በብዙ ተራቋል፤ተጠቧል፤ ውበቷ በሩቅ ይስባል፤ አጥንትም ይሰብራል፤አዕምሮን ይሰውራል፡፡ ይገርማል!" ይላሉ፡፡

     

     ምንም እንኳን ውበት እንደተመልካቹ ነው ቢባልም፤ መርማሪዎቹ በዚህ ዓይነት Vulgar Natioanlism ሰክረው እኔና የእኔ ትውልድ ሀገሪቱን ‹በውበቷ ለሰከሩ› ነጮች ልንሸጣት እንደተዋዋልን እየነገሩኝ ነው፡፡ ይገርማል! ዲሞክራሲን ከልማት እኩል ማስኬድ ነውር የለበትም፤ ተገቢም ነው ማለት እንደ አገር ሽያጭ ውል የሚቆጠርበት ብሎም ‹ሩቅ አስባ ሩቅ ለማደር እየተጋች ያለችን አገር› መንገድ ላይ በጠረባ ለመጣል የተደረገ ሙከራ ተደርጎ የሚወለድባትና ‹አሸባሪ› የምንሰኝባት፣ ‹ለፈገግታ ያህል ትንሽ ከንፈሯን ስትገልጠው እንኳን ሰውን ግብዙን መልዓክ የምታሳብደው ኢትዮጵያ!

     

    ሊቁ ገብረሕይወት ባይከዳኝ ‹ልማትን ሲተች›  “እውቀት በሌለው ሕዝብ አገር መንገድና የምድር ባቡር ቢሰራ ሕዝቡ እንዲደኸይ ያፋጥናል እንጂ አይጠቅመውም፡፡ ጥቅሙ ከርሱ ጋር የሚገበያዩ አዋቂ ሕዝቦች ነው”  በማለት ‹ልማት ብቻውን ዋጋ የለውም› ሲል ይበይናል፡፡ ገብረሕይወት የእኛው ትውልድ አባል ቢሆን ኖሮ  “የኢኮኖሚ እድገቱን በመካድ፤ ሕዝቡ በአዕምሮ መናወጥ ምክንያት የዘረጋነውን የባቡር ሀዲድ ፈነቃቅሎ እንዲጥልና ሌሎች የሽብር ተግባራትን እንዲፈፀም በማነሳሳት ‹ወንጀል›” መመርመሩና መከሰሱ አይቀሬ ነበር፡፡

    ውዴ! ያን ‹አሸባሪ› ሳቅሽን ሳስብ በፀረ-ሽብር ሕጉ መሠረት ጉዳይሽ ሊታይ ይችላል የሚል ስጋቴ የበዛ ነው፡

     

    5.   ናፍቆቴ ሆይ!

    እንዲያው ለዚህ 84 ቀናት ውስጥ የሆንኩትን ሁሉ እንዳልፅፍልሽ እንዳትሰለችብኝ ፈራሁ፡፡ እያንዳንዱን ሁነት በ Diary መልክ ከትቤ እንዳልክልሽ በነዛ ቀናት ውስጥ ብዕርም ሆነ ነጭ ወረቀት ይዞ መገኘት ‹ከፍ ብሎ አንገትን፣ ዝቅ ብሎ ባትን› ባያስቆርጥም ዛቻና ዱላን ማስከተሉ አይቀርም ነበርና ልከትብ አልቻልኩም፡፡ እንዲሁ በደፈናው ግን አንዳንድ ጉዳዮችን ብዘረዝርልሽ፡

    •  በነዛ ክፉ ቀናት ከምሽቱ 12 ሰዓት እንቅልፍ መተኛትን ለመድኩ፡፡ ይሔም ነገር መልካም እንደሆነ አየሁ፡፡ ምክንያቱም ሌሊት ከእንቅልፍ ተቀስቅሰው ራቁታቸውን ሲደበደቡ አድረው ከ 3 እና 4 ሰዓታት ቆይታ በኋላ በነፍስ ወደ መኝታ ክፍላችን የሚመጡ የእስር ጓደኞቼን  (Cellmates) ስቃይና ሰቆቃ ላለመስማት፡፡
    •  በ2004 ዓ.ም የፌዴራል ፖሊስ ‘Cyber crime Laboratory’ ተቋቁሟል መባሉን ሰምቼ ‹እንግዲህ cyber criminal ሁሉ የት ትገቢ? አለቀልሽ!› ብዬ ነበር፡፡ በጊዜ ቀጠሮ ጊዜ እንደተረዳሁት ደግሞ ‹ያለችን አንዲት ኮምፒውተር ናት የእነዚህ ልጆች ዳታ በአንድ ኮምፒውተር መርምረን መጨረስ ስላልቻልን የጊዜ ቀጠሮ ይሰጠን› ሲባል ነው፡፡ አረ እንዲያውም ‹እስኪ Anti-virus ካለህ ኮምፒውተሬ ላይ ጫንልኝ› ተብዩ ሁሉ ነበር፡፡ ‹ለሽብር ተግባራት› መመርመሪያ ያልሆነ ‘Cyber crime laboratory’ ለመች ሊሆን ነው?
    • አንድ ቀኑንና ወሩን በማላስታውሰው ቀን አንድ ጎልማሳ የታሰርንበትን ክፍል አስከፍተው ገቡና እያንዳንዳችን መጠየቅ ጀመሩ፡

    -   ‹አንተ ከየት ነው የመጣኸው?› (አንድ ተማሪ ወዳጄን)

    -   ‹ከሀሮማያ ዩኒቨርስቲ›

    -   ‹አሀ እናንተ ናችኋ…..›

    ****

    -   ‹አንተኛውስ ከየት ነው የመጣኸው?!›

    -   ‹ከወለጋ ዩኒቨርስቲ›

    -   ‹አሁን ኦሮሚያ ብትለማ ምን የሚያስከፋ ነገር አለው?!....›

    *****

    -   ‹አንተስ ከየት ነው የመጣኸው› (እኔን ነው)

    -   ‹ከአምቦ ዩኒቨርስቲ›

    -   ‹ሕዝቡን እርስ በርስ አጋጭታችሁ ከተማዋን በደም ያጠባችኋት እናንተ….›

    -   ‹አረ እኔ ከግጭቱ በፊት ነው የታሰርኩት›

    -   ‹በእውነት ነው የምልክ እድለኛ ነህ፡፡ የኦሮሚያን ልማት ተቃወመ ተብለህ በታሪክ አለመስፈርህ በጣም እድለኛ አድርጎሀል፡፡›

    (ለመሳቅ ሁላችንም የጎልማሳውን ከክፍል መውጣት እየተጠባበቅን እኮ ነው ውዴ) - ሁሉ ቧልት የሆነበት ሀገር!

     

    በነዚህ ሁሉ የጉድ ቀናት ለምን እንደታሰርኩ ትክክለኛውን ምክንያት የሚነግረኝ አካል ፍለጋ ሁሌም አስብ ነበር፡፡ መታሰሬ ግን አያስገርመኝም፤ አያስከፋኝም! ደስታን በሔድኩበት ሁሉ እፈልጋለሁ፤ የእድል ነገር ሆኖ ደስታም ከእኔ አይርቅም፡፡ ፍቅሬ ለረጅም ዘመናት ‹የሰው የመኖር አላማ ማወቅ ነው› የሚለውን Aristotlian (አሪስቶትሊያን) አስተምህሮ በልቤ ይዤ እኖር ነበር፤ ከቅርብ ጊዜ ወዲህ ግን ‹የመኖር ዓላማ መደሰት ነው› የሚለው አስተምህሮ በአርስቶትሉ ‹የማወቅ ዓላማ› ደባልቄ ይሔው እየተደሰትኩልሽና እያወቅሁልሽ እገኛለሁ፡፡ ‹አንች› የደስታዬ ምንጭ፡

     

    ‘‘Thanks to you….For you exist’

    Clézio

     

    ስለክሴና ስለተስፋዬ ሌላ ደብዳቤ እፅፍልሻለሁ፡፡

    P.S አሳሪዬ ሆይ ልብ ይስጥህ!

                                                                ያንችው ዘላለም

                                                                            ከብዙ ፍቅር ጋር!

     

     

    Read more »
  • 7 people died after bus accident in Addis Abeba እንጦጦ አካባቢ አንድ የከተማ አውቶብስ በሰባት ሰዎች ላይ የሞት አደጋ አደረሰ

    አዲስ አበባ፣ ነሃሴ 2፣ 2006 (ኤፍ.ቢ.ሲ.) ከኪዳነ ምህረት ወደ እንጦጦ ሲጓዝ የነበረ የከተማ አውቶብስ በሰባት ሰዎች ላይ የሞት አደጋ አደረሰ።

    እንጦጦ ኪዳነ ምህረት አካባቢ ትናንት ምሽት 2 ስአት ከ25 ላይ ነው አደጋው የደረሰው።

    በአደጋው ሶስት ሶስት ሰዎች ወዲያውኑ ህይዎታቸው ሲያልፍ ሶስቱ ደግም ወደ ሆስፒታል የህክምና እርዳታ ሊደረግላቸው ሲል መንገድ ላይ አርፈዋል። አንደኛው ደግሞ ዛሬ ጠዋት ላይ ህይወቱ አልፏል።

    በአደጋው ህይዎታቸው ያለፈው ሁሉም መንገደኞች ሲሆኑ፥ የአደጋው መንስኤም በመጣራት ላይ ይገኛል ተብሏል።

    በርካታ ሰዎች ከባድና ቀላል የአካል ጉዳት የደረሰባቸው መሆኑም ተገልጿል።

    አውቶብሱ ከፓል ጋር ተጋጭቶ ስለነበር የድንገተኛ አደጋ ቁጥጥሩን አስቸጋሪ አድርጎት እንደነበርም ተነግሯል።

    ትኩስ እና ሰበር ዜና፣ በብዛት የታዩ ቪድዮዎችን፣ ድራማዎችን፣ሙዚቃዎችን፣ ጠቃሚ ምክሮችን እና አስገራሚ ታሪኮችን በኢሜል አድራሻዎ እንልካለን። ኢሜሎን ያስመዘግቡ።

     

     

    Read more »
  • “ሮኬት እየዘነበብን፣ ራሳችንን ከመከላከል ውጪ ሌላ ምርጫ የለንም” አምባሳደር በላይነሽ ዚቫዲያ በኢትዮጵያ የእስራኤል አምባሳደር

    በ ፋኑኤል ክንፉ (ሰንደቅ)

    አምባሳደር በላይነሽ ዚቫዲያ ባለትዳር እና የሦስት ልጆች እናት ናቸው። ትውልዳቸው ኢትዮጵያ ውስጥ ሲሆን የሁለተኛ ደረጃ ትምህርታቸውን በኮከበ ጽባህ ሁለተኛ ደረጃ ትምህርት ቤት ነው የተከታተሉት። የመጀመሪያና ሁለተኛ ዲግሪያቸውን እስራኤል ሀገር ከሚገኘው ከሂብሩ ዩኒቨርሲቲ ወስደዋል።

        በኢትዮጵያ እና በእስራኤል የግንኙነት ታሪክ ኢትዮጵያ ውስጥ የተወለዱ የመጀመሪያ ቤተ-እስራኤላዊ ከፍተኛ የእስራኤል መንግስት ባለስልጣን በመሆን ወደ ኢትዮጵያ የመጡት አምባሳደር በላይነሽ በአሁን ሰዓት በኢትዮጵያ የእስራኤል አምባሳደር በመሆን እያገለገሉ ይገኛሉ።

          በእስራኤል የውጭ ጉዳይ ሚኒስትር መስሪያ ቤት ውስጥ ስራ ከጀመሩ ሃያ አንድ አመታት ሆኗቸዋል። ይህን እድል ያገኙት በወቅቱ ለውድድር ቀርበው ከነበሩ ሁለት ሺ ተወዳዳሪዎች መካከል ካለፉት ሃያ ሦስት ተመራጮች አንዷ በመሆን ነበር። ለመጀመሪያ የመስሪያ ቤቱ ቅጥሮች የሚሰጠውን የሦስት ዓመት የካዴትነት ኮርስ በብቃት መወጣታቸውን ሲያስታውሱት፤ “እድለኛ ያደርገኛል፣ በጣም ፈተና የበዛበት የትምህርት መስክን በከፍተኛ ስራ በመወጣት ነው ለዚህ የበቃሁት” ብለዋል።

         ከኢትዮጵያ ውጪ በአሜሪካ ሀገር የእስራኤል ዲፕሎማት በመሆን በሁስተን፣ በቺካጎ እና በኒውዮርክ ከተሞች ውስጥ አገልግለዋል። ከእኝህ ሲኒየር ዲፕሎማት ጋር የዝግጅት ክፍላችን ባልደረባ ፋኑኤል ክንፉ ያደረገውን ወቅታዊ ቃለ ምልልስ በዚህም መልኩ አስተናግደነዋል።

     

        ሰንደቅ፡- በአብዛኛው ከሚታወቁት የቤተ-እስራኤላዊያን የሕዝብ ለሕዝብ ግንኙነት እንዲሁም የንግስተ ሳባ ታሪካዊ ዳራዎች ውጪ፣ በአሁን ሰዓት በተጨባጭ ማሳያ የሚሆኑ የእስራኤል እና የኢትዮጵያ ግንኙነቶች ምንድን ናቸው?

        አምባሳደር በላይነሽ ዚቫዲያ፡-እኔ ከመጣሁ በኋላ ያሉትን ነገሮች ላስቀምጥል እችላለሁ። እስራኤል ሀገሬ ብትሆንም ኢትዮጵያ ያደኩባት የተማርኩባት ሁለተኛ ሀገሬ ነች። ስለዚህም የኢትዮጵያን ልማት በሚያፋጥኑ ሥራዎች ላይ አተኩረን እየሰራን ነው የምንገኘው። መንግስቴም እኔም ኢትዮጵያ ለምታ በልፅጋ ማየት ፍላጎታችን ነው።

         ከእነዚህ ነጥቦች በመነሳት እኔ ከመጣሁ በኋላ ሦስት ከፍተኛ የእስራኤል ሚኒስትሮች ኢትዮጵያን ጎብኝተዋል። በቅርቡ የእስራኤል የውጭ ጉዳይ ሚኒስትር አቪዶር ሊበርማን አርባ አራት የእስራኤል ትልልቅ የኩባንያ ባለቤቶች እና ኃላፊዎችን ይዘው በመምጣት ከኢትዮጵያ ባለሃብቶች ጋር የአንድ ቀን ሰሚናር በማድረግ የልምድና የመረጃ ልውውጦች አድርገዋል። ከዚህም በፊት የእስራኤል የግብርና ሚኒስትር ተመሳሳይ የሆኑ ስራዎችን አከናውነዋል። እነዚህ ሌሎች ስራዎቻችን በሁለቱ ሀገሮች መካከል እየተሰራ ላለው የኢኮኖሚ ዲፕሎማሲ ማሳያዎች ናቸው።

         ሰንደቅ፡- የእስራኤል የውጭ ጉዳይ ሚኒስትር እ.ኤ.አ 2009 እና አሁን በ2014 በአምስት የአፍሪካ ሀገሮች ጉብኝት ማድረጋቸው ይታወቃል። የእሳቸውን ጉብኝት የዓረቡ ዓለም መንግስታት በጥርጣሬ ይመለከቱታል። በተለይ የዓረብ ዓለም መገናኛ ብዙሃን ከዓረቡ ዓለም ፍላጎት በመነሳት በአሉታዊና በጥርጣሬ የተሞሉ ዘገባዎች ያቀርባሉ። ይህ ለእርስዎ ምን ትርጉም ይሰጥዎታል?

       አምባሳደር በላይነሽ ዚቫዲያ፡- የእስራኤል የውጭ ጉዳይ ሚኒስትር ሊበርማን ከተመረጡበት እ.ኤ.አ. 2009 ጀምሮ ከአፍሪካ ሀገሮች ጋር ተቀራርቦ መስራትን በመርህነት ሲያራምዱ ነበር። ይህን እምነታቸውን ወደ ተግባር በመቀየር ከአንድም ሁለት ጊዜ በተለያዩ የአፍሪካ ሀገሮች ጉብኝት በማድረግ የተለያዩ የጋራ ስምምነቶች በመፈፀም ከአፍሪካ ሀገሮች ጋር በትብብር እየሰሩ ይገኛሉ።

         መታወቅ ያለበት በአሁን ሰዓት አፍሪካ በፈጣን የእድገት ጎዳና ላይ ነው የምትገኘው። ይህን የአፍሪካ እድገት እስራኤል ማገዝ ትፈልጋለች። እንደሚታወቀው በዓለም ላይ “startup nation” ከሚባሉት መካከል እስራኤል ቁጥር አንድ ነች። ይህም ሲባል ከፍተኛ የፈጠራ ስራዎች፣ አዳዲስ የቴክኖሎጂ ውጤቶች፣ የግብርና ቴክኖሎጂዎች በእስራኤል ሀገር ይፈበረካሉ። እነዚህን ቴከተኖሎጂዎች ለአፍሪካ ሀገሮች መንግስታችን ማካፈል ይፈልጋል። በአፍሪካ ሀገሮች እድገት ላይ የበኩላችንን ማድረግ እንፈልጋለን። በእነዚህ መነሻዎች ነው የውጭ ጉዳይ ሚኒስትራችን በአፍሪካ ውስጥ ጉብኝቶች ያደረጉት። ከዚህ ውጪ የተለየ ዓላማ ያለው ጉብኝት አይደለም።

        ሰንደቅ፡- የግብፅ ፖለቲከኞች እና የመገናኛ ብዙሃን ከኢትዮጵያ የሕዳሴ ግድብ ኃይል ማመንጫ ግንባታ በስተጀርባ የእስራኤል እጅ አለበት የሚል ክስ በብዛት ሲያቀርቡ ይደመጣል። በርግጥ መንግስትዎ ከዚህ የህዳሴ ኃይል ማመንጫ ግድብ ግንባታ ጀርባ ይገኛል?

        አምባሳደር በላይነሽ ዚቫዲያ፡- በነገራችን ላይ ግብፅ ብቻ ሳትሆን አብዛኛው የዓረቡ ዓለም አንድ ነገር ሲፈጠር የእስራኤል እጅ አለበት የሚል ክስ ሲሰነዝሩ መስማት የተለመደ ሆኖ መጥቷል። በእንደዚህ አይነት ይዘት ላይ በተነሳ ክርክር አንድ ግለሰብ ያለውን ልንገርህ፤ የሳዑዲ ዓረቢያ ሴቶች መኪና መንዳት ቢጀምሩ ከዚህ በስተጀርባ የእስራኤል እጅ አለበት የሚል ክስ ይዘው ብቅ ይላሉ።

        በዚህ ጉዳይ ላይ ልል የምችለው በኢትዮጵያ እና በግብፅ መካከል የሕዳሴውን ግድብ አስመልክቶ ልዩነት ካላቸው እራሳቸው ይፍቱት እንጂ እኛን የሚመለከት ጉዳይ አይደለም።

        ሰንደቅ፡- በአሁን ሰዓት በእስራኤልና በሃማስ መካከል እየተደረገ ያለው ጦርነት እስካሁን ከሺህ በላይ ፍልስጤማውያን ሕይወት የቀጠፈ ነው። ከእነዚህ ውስጥ 80 በመቶ የሚሆኑት ሲቪሎች ናቸው። የተወሰደው የጦርነት አማራጭ ከቀጠፈው የሰዎች ህይወት አንፃር እንዴት ይመለከቱታል?

        አምባሳደር በላይነሽ ዚቫዲያ፡- እኛ እስራኤላዊያን ለሰው ልጅ ህይወት ክብር ቦታ የምንሰጥ ነን። አሁን ጉዳዩን እንደ ሦስተኛ ወገን ለሚመለከተው ብዙ ጥያቄዎች ሊያነሳ ይችላል። ለጠፋው የሲቪል ሰዎች ሕይወት ግን መንግስቴ በፍፁም ተጠያቂ አይደለም። ምክንያቱም ሃማስ እስራኤልን ለማጥፋት በታናሎች በኩል ወደ ጋዛ የሚያስገባውን የጦር መሣሪያዎችን የሚደብቅባቸው ቦታዎችን ስንመለከት ትምህርት ቤት፣ ሆስፒታል፣ መስኪድ፣ መዋዕለ ሕፃናት፣ የሕዝብ መሰብሰቢያ ቦታዎች ናቸው። ሃማስ ይህን የሚያደርገው የእስራኤል መንግስት የሃማስን አውዳሚ የጦር መሣሪያዎች ለመደምሰስ በሚወሰደው እርምጃ ከፍተኛ የሆነ የሰብአዊ ሰዎች ሕይወት እንዲጠፋ ስለሚፈልግ ነው።

          ሰንደቅ፡- ከሚጠፋው የሰብአዊ ሕይወት ሃማስ ምን ሊጠቀም ይችላል ብሎ መውሰድ ይቻላል?

        አምባሳደር በላይነሽ ዚቫዲያ፡- የሃማስ መሪዎች ደሃ የፍልስጤም ልጆችን ከጦር መሳሪያ ጋር በመቀላቀል ካስፈጃቸው በኋላ በተለያዩ ዓለም አቀፍ ሚዲያዎች በማራገብ እስራኤል ላይ ዓለም አቀፍ ጫና የማሳደር ስራዎች ለመስራት የሚጠቀሙበት ስልትን ነው። በጣም የማዝነው በዚህ ሰብአዊነት በጐደለው ስልታቸው አንድም የሃማስ ባለስልጣን ልጆች ሰለባ አይሆኑም። የእነሱ ልጅ በሌሎች ሀገሮች ተንደላቀው ይማራሉ፣ ይኖራሉ። የደሃው የፍልስጤም ልጆች ግን ለእነሱ የፕሮፓጋንዳ እና በዚህ ሁኔታ ለሚሰበስቡት የገንዘብ ድጋፍ ያውሏቸዋል።

         የሚገርመው የተባበሩት መንግስታት ያሰራውን ትምህርት ቤት ሳይቀር የጦር መሣሪያ ማከማቻ አድርገውታል። የአምቡላንስ ጥሪን እያጮሁ እርጉዝ ምጧ የመጣባት አስመስለው የአጥፍቶ ጠፊ ስራዎች ሲያከናውኑ ትመለከታለህ። ወጣቶቹን መሞት ገነት ያስገባል እያሉ ለጥፋት ያሰልፏቸዋል። ይህን ሁሉ የሚያደርጉት በሰብአዊ ቀውስ ጥፋት ዓለም አቀፍ ግፊት እናገኛለን ከማለት የተሳሳተ አስተሳሰብ በመነሳት ነው። እነዚህን የሽብር ኃይሎችን ነው እየታገልን ያለነው። ማንም ሀገር እኛ የተሸከምነውን ተሸክሞ እየኖረ አይደለም።

         ሰንደቅ- ከሃማስ በቀጥታም ሆነ በተዘዋዋሪ ጦርነት ማድረግ ከጀመራችሁ ወደ ሃያ ሰባት ዓመት ይጠጋል። የቅርብ ጊዜዎችን ብንወስድ እንኳን በ2004፣ በ2006፣ በ2008፣ በ2012 አሁን ደግሞ በ2014 ከዚህ አንፃር መንግስትዎ የሃማስን ችግር የሚፈታበት ስትራቴጂክ የሆነ መፍትሄ የለውም ብሎ መውሰድ ይቻላል? እንዲሁም ከአካባቢው የአረብ አገራት ጋር ከዚህ ጋር በተያያዘ ስትራቴጂክ የሆነ የመፍትሄ ሃሳብ መንግስትም አለው?

        አምባሳደር በላይነሽ ዚቫዲያ፡- በመጀመሪያ ሃማስ እንዲሁም ከጀርባው ያሉ የአረብ አገሮችና ሌሎችም ድጋፍ የሚያደርጉ ኃይሎችን በተመለከተ ስትራቴጂክ የሆነ መፍትሄ ይዘህ ልትመጣ አትችልም። ከሃማስ ጀርባ የቆሙ ኃይሎች እስራኤልን ለማጥቃት አንድ ሲሆኑ ይታያሉ እንጂ በውስጣቸው በአንድነት ሊያቆማቸው የሚችል ምንም ነገር የለም። እርስ በርሳቸው የማይስማሙ ኃይሎች ናቸው።

        ለምሳሌ በ2006 በኳታር አደራዳሪነት ጋዛን ለቀን ስንመጣ ታሳቢ የተደረገው የሰላም ድርድሩ ይቀጥላል፣ ሁላችንም በሰላም እንኖራለን ብለን አስበን ነበር። የሆነው ግን ለቀን በወጣነው መሬት ላይ የሮኬት መወንጨፊያ ቦታዎች ተቆፍረው ተተክለው በእኛ ላይ የሮኬት ዝናብ መልቀቅ ነው። ፕሬዝዳንታችን ሺሞን ፔሬዝ እንደገለፁት፤ ለአሸባሪው የሃማስ ቡድን ከፍተኛ ገንዘብ እየረዳች የምትገኘው በወቅቱ የእስራኤልና የሃማስ አደራዳሪ የነበረችው ኳታር ነች። የሃማስ መሪዎች በአሁኑ ሰዓት ኳታር ውስጥ ሆነው ነው ይህን የሽብር ጦርነት የሚያራምዱት።

         ሌላ መውሰድ ትችላለህ፤ በሶሪያ ውስጥ ስንት ሰዎች ናቸው የረገፉት? አሁንም እየረገፉ ያሉት? ለንፁሃን ዜጐች መቀጠፍ የአረቡ ዓለም መሪዎች የተለያየ ፍላጐት መሆኑ ይታወቃል። ማወቅ ያለብህ በሃምሳ ሰባት የእስልምና እምነት ተከታይ ሀገሮች ተከበን የምንኖር ብቸኛ ሕዝቦች ነን። ከዚህ አንፃር የተለያየ ፍላጐት ያላቸው ሀገሮች ከበውን ስለምንኖር አንድ ወጥ የሆነ ወይም ሰትራቴጂካዊ የሆነ ምላሽ ለመስጠት የሚያስችሉ ሁኔታዎች የሉም።

         ስትራቴጂክ የሆነ ምላሽ ለመስጠት ከአረቡ ዓለም በአንፃራዊነት ሳዳትን የመሰለ መሪ ሊኖራቸው ይገባል። ሳዳት እ.ኤ.አ. በ1970 በእስራኤል ፓርላማ ፊት ለፊት ቆሞ ደም መቃባት መቆም አለበት አለ። የእስራኤል መንግስትም ተገቢውን ምላሽ አቅርቧል። በዚህ ደረጃ በአንፃራዊነት ነጥሮ የሚወጣ መሪ የአረቡ ዓለም ያስፈልገዋል። ዛሬ በአንድ ጋዜጣ ላይ ሳነብ፤ የፕሬዝደንት አባሽ ልጅ የተናገረው፤ “ክፍት ከሚባል (ከእስራኤል ሰሜናዊ ክፍል የሚገኝ ቦታ ነው) ነው የመጣነው። ወደእዛ እንመለሳለን” ነው ያለው። ይህ ማለት እስራኤልን እናጠፋታለን እያለ ነው። በዚህ መንፈስ ውስጥ የሚገኙ ኃይሎች ናቸው። ስለዚህም አንድ ወጥ የሆነ ስትራቴጂክ ምላሽ የምትሰጠው ሳይሆን፤ ከተጨባጭ አደጋዎች እየተነሳህ ምላሽ የምትሰጥበት ሁኔታዎች ናቸው በአካባቢው ያሉት።

        ሰንደቅ፡-ሃማስ እስራኤል በምታቀርበው ደረጃ ስጋት (Existential Treat) አይደለም የሚሉ ወገኖች አሉ። ይህን አስተያየት እንዴት ይረዱታል?

        አምባሳደር በላይነሽ ዚቫዲያ፡- እኔ ምንም የሚገባኝ መከራከሪያ አይደለም። አራት ሚሊዮን ሕዝብ በመጠለያ ውስጥ ነው የሚኖረው እንዴት ይህ እንደ ስጋት አይወስድም? ጦርነቱ በጣም በመልከዓ ምድራዊ አቀማመጥ በጣም በተራራቁ ሀገሮች መካከል የሚደረግ አይደለም። መርካቶ ላይ ሆኖ ቦሌ አካባቢ ሮኬት ማስወንጨፍ ማለት ነው። በሁለትና በአራት ኪሎ ሜትር ርቀት ውስጥ የሚደረግ ጦርነት ነው። በዚህ ርቀት ላይ ሆነው ነው ሮኬቱን የሚያስወነጭፉት። ሃማስ ለእኛ ተጨባጭ ስጋት ነው። በእኛ ቦታ ሆኖ ነገሮችን ማየት ያስፈልጋል።

         ሰንደቅ፡- እርስዎ በሚሉት ደረጃ የእስራኤልን ችግር ለዓለም ሕዝብ ማስረዳት የቻላችሁ አልመሰለኝም። ምክንያቱም የተባበሩት መንግስታት አሁን በሲቪል ሰዎች ላይ የደረሰውን ሞት ተከትሎ በጦር ወንጀል ውንጀላ ምርመራ ለማጣራት ውሳኔ ላይ ደርሷል። ከዚህ በፊትም የደቡብ አፍሪካ ዐቃቤ ሕግ የነበሩት ጐልደን ስቶን እንዲያጣሩ መሰየማቸው ይታወሳል። ይህ ለሁለተኛ ጊዜ ነው። በዚህ ላይ ምን ይላሉ?

         አምባሳደር በላይነሽ ዚቫዲያ፡- ያስቀመጥከው ነገር ትክክል ነው። በእኛ ቦታ ሆነህ ቢመለከቱት የሮኬት መአት በላያችን ላይ እየዘነበ መቼም ቁጭ ብለን አንደበደብም። እየተደበደብንም ቁጭ አንልም። ሮኬት እየዘነበብን ራሳችንን ከመከላከል ውጪ አማራጭ የለንም፡፡ አንድ ቀን በእጃችን የያዝነው እውነት አሸንፎ ይወጣል፡፡ ሌላው ቀርቶ ለተባበሩት መንግስታት የተኩስ አቁም ጥሪ እኛ ፈቃደኛ ብንሆንም ሃማስ ግን እምቢተኛ ሆኗል። የሰላም ኃይል ቢሆኑ የሰላም ጥሪውን ይቀበሉት ነበር።

         ሰንደቅ፡- የጦርነቱ መንስኤ የልጆቹ መገደል አይደለም። እስራኤል ሃማስን ለመምታት አመቺ ሁኔታዎችን ግምት ውስጥ በማስገባት ነው የተንቀሳቀሰችው። ይህም ሲባል ሃማስ ከግብፅና ከሳዑዲ ዓረቢያ ጋር በአሁኑ ሰዓት በጥሩ ግንኙነት ላይ አይገኝም። ኢራን እና ሶርያ በራሳቸው ችግር ውስጥ ተዘፍቀው ነው ያሉት። ሂዝቦላ በሶርያና በኢራቅ ውስጥ ውጊያ እያካሄደ ነው። ስለዚህም ሃማስን የማጥቂያ ጊዜው አሁን በመሆኑ ነው ጦርነቱ የተጀመረው ብለው የሚከራከሩ አሉ። በዚህ የመከራከሪያ ነጥብ ላይ ምን ይላሉ?

         አምባሳደር በላይነሽ ዚቫዲያ፡- ማንም የራሱን ትንታኔ በፈለገው መንገድ ሊያቀርብ ይችላል። እኛ ግን በላያችን ላይ የሚወነጨፉት የሃማስ ሚሳኤሎችን ለማምከን እና የሃማስን የሽብር እንቅስቃሴ ለመበጣጠስ እየታገልን ነው የምንገኘው።

          የዓለም ሕዝብ ወይም አንተ ያነሳሃቸው ምሁራን ያልገባቸው መሠረታዊ ነጥብ፤ የሃማሰን ሮኬቶች በፈበረክናቸው የሚሳኤል ማምከኛ መሣሪያዎች መቆጣጠር ባንችል የሚሞቱት ዜጐቻችን ቁጥር ከፍልስጤሞች በጣም ያሻቅብ ነበር። ምክንያቱም እኛ በተመረጡ ቦታዎች ላይ ብቻ ጥቃት ስንፈጽም ሃማስ ግን ሙሉ ለሙሉ በእስራኤል ዜጐች ላይ ያነጣጠረ የሮኬት ጥቃት ስለሚፈፀም ነው። እየደረሰብን ያለውን ጉዳት የዓለም ሕዝብ በተገቢ ሁኔታ አልተረዳልንም ከሚል መነሻ ብቻ፣ ዜጐቻችንን ለሃማስ ሮኬት ጥቃት አሳልፈን በመስጠት መረጃ መሰብሰብ ያለብን አይመስለኝም።

         ሰንደቅ፡- የእስራኤል መንግስት አስፈፃሚ አካል በጦር ሠራዊቱ ተቋማት ተጽእኖ ስር በመሆኑ በአካባቢው በሚፈጠሩ ችግሮች ዙሪያ የፖለቲካ መፍትሄ ከመሻት ይልቅ ጉዳዮችን በጦር ሰራዊት የበላይነት መፍታትን የመጀመሪያው ምርጫ ያደርጋሉ። ይህን መከራከሪያ ምን ያህል ይቀበሉታል?

         አምባሳደር በላይነሽ ዚቫዲያ፡- ነጥብ አልባ መከራከሪያ ነው። እኛ በአንድ ልብ በአንድ መንፈስ ለእስራኤል ሕልውና የምንሰራ ሕዝቦች ነን። አንዱ ሌላው ላይ የሚያሳድረው ተፅዕኖ ፈጽሞ የለም።

         ሰንደቅ፡- ፋታህ እና ሃማስ የአንድነት መንግስት ለማቋቋም ከስምምነት ላይ መድረሳቸው ለአካባቢው ሰላም አንድ እርምጃ ነው። በተለይ ሃማስን ወደ ሕጋዊ የመንግስት መዋቅር ውስጥ መግባቱ ለቁጥጥር አመቺ ሁኔታዎች ይፈጥራል። ሆኖም ግን የእስራኤል ጠቅላይ ሚኒስትር ቤንጃሚን ኔታንያሁ ስምምነቱን በሰላም እና በሽብር መካከል የተደረገ ስምምነት አድርገው ማውገዛቸው ስህተት ነው የሚሉ ምሁራን አሉ። በዚህ ላይ የእርስዎ አስተያየት ምንድን ነው?

         አምባሳደር በላይነሽ ዚቫዲያ፡- የጠቅላይ ሚኒስትራችን አቋም በጣም ትክክል ነው። ሃማስ የእስራኤልን ህልውና የማይቀበል የሽብር ቡድን ነው። ከዚህ አይነቱ የሽብር ቡድን ጋር ፋታህ አንድነት ውስጥ ሲገባ ለእኛ እስራኤሎች የሚሰጠን ትርጉም የተለየ መሆኑ መታወቅ ይኖርበታል። የእኛን ህልውና የማይቀበል እኛን ለማጥፋት ሌት ተቀን የሚሰራ የሽብር ቡድን ከሰላም ፈላጊዎች ጋር አብሮ እንዴት ሊሰለፍ ይችላል? ለዚህም ነው በሰላም እና በሽብር መካከል የተደረገ ስምምነት አድርጐ መንግስታችን የሚመለከተው።

         ሰንደቅ፡- በዚህ የእስራኤል ጋዛ ግጭት ሁለት ቤተ-እስራኤላውያን ሕይወታቸውን ለሀገራቸው ሰውተዋል። ሕይወትን ለሀገር ከመሰዋት በላይ ትልቅ ክፍያ አይኖርም። ይህን ጀግንነታቸውን ከግምት ውስጥ በማስገባት ከዚህ በፊት በቤተ-እስራኤላውያን ላይ ይደረግ የነበረው መገለልና አድልኦ በአሁን ሰዓት በምን ሁኔታ ላይ ይገኛል?

         አምባሳደር በላይነሽ ዚቫዲያ፡- በነገራችን ላይ መገለልና አድልኦ በምትለው ደረጃ በእኛ ቤተ-እስራኤላውያን ላይ ተፈጽሟል ለማለት ይከብደኛል። ምክንያቱም እኛ ከነበርንበት የኑሮ ደረጃና የትምህርት ተወዳዳሪነት ከሌሎች ሀገሮች ወደ እስራኤል ከተመለሱት እስራኤላውያን አንፃር ዝቅተኛ ነው።

         በተለይ ከሩሲያ የመጡት የተማሩና ሃብታም ናቸው። በዘመናዊ ትምህርትም ይሁን አኗኗር የቀረቡ ናቸው። እኛ ደግሞ በኑሮ ዝቅተኛ ነበርን፤ በትምህርትም ብዙ ተወዳዳሪዎች አልነበርንም። በእንደዚህ ሁኔታ ውስጥ የተፈጠሩ አመቺ ያልሆኑ የተለያዩ ጉዳዮች ነበሩ። እነዚህን ክፍተቶች ለመሙላት ወላጆቻችን ያደረጉት እኔና እኔን መሰሎችን ወደ ትምህርት ቤት መላክ ነበር። ይህን ስል ግን ሁሉም ነገሮች አልጋ በአልጋ ነበሩ እያልኩ አይደለም።

         መነሳት ያለበት ግን አብዛኛው ቤተ-አስራኤላዊ ቤት ይገዛል። ይህ የሆነበት ዘጠና በመቶ የቤቱ ክፍያ በመንግስት ስለሚሸፈን ነው። ምክንያቱም ቤተ-እስራኤላውያን አነስተኛ ገቢ እንዳላቸው ስለሚታወቅ ነው። ሌላው የመጀመሪያም ሁለተኛም ዲግሪ በነፃ እንዲሰሩ ተፈቅዷል። ሌሎችም ብዙ መልካም ነገሮች አሉ። በአንዳንድ ሚዲያዎች ግን ችግሮችን ብቻ ነቅሰው በማውጣት ስለሚያራግቡ በእኛ ላይ የተለየ በደል የሚፀምብን አድርገው ያቀርባሉ። ይህ ግን ፈጽሞ የተሳሳተ መረጃ ነው።

    ትኩስ እና ሰበር ዜና፣ በብዛት የታዩ ቪድዮዎችን፣ ድራማዎችን፣ሙዚቃዎችን፣ ጠቃሚ ምክሮችን እና አስገራሚ ታሪኮችን በኢሜል አድራሻዎ እንልካለን። ኢሜሎን ያስመዘግቡ።

     

    Read more »
RSS